Бас қалада медұйымдардың бір бөлігінде жөндеу жұмыстары жүргізіледі.

Медициналық ұйымдарды заманауи жабдықтармен жарақтандыру, мекемелердің ішкі, сыртқы келбетін жөнге келтіру, пациенттерге қолайлы жағдай жасау мәселелері өзектілік және маңыздылық жағынан бәрінен де алда.

Бүгін бірнеше елордалық медұйымдарды аралап шықтым. Стационарларды материалдық-техникалық жабдықтау, ауруханалардың жекелеген блоктарына күрделі жөндеу жұмыстарын жүргізу қажеттілігі бірден білінді.

Айта кетсем, №1 Көпбейінді қалалық балалар ауруханасы ғимаратының қасбеті жаңартуды талап етеді, қазандық қондырғысын да жөндеу қажет: құбырлар мен еденді ауыстыру, қабырғаларды бояу, сылау және басқасы.

Азық-түліктің дұрыс сақталуына көз жеткізу үшін ас-үй бөлмесіне көтерілдім. Пеш қасында аспаздарды байқап, тамақтың сақталуы барлық талаптарға сай екеніне көзім жетті. Соңында кішкентай пациенттердің хәл-жағдайын біліп, кәсіпорын ұжымымен әңгімелесіп қайттым.

№1 Көпбейінді қалалық аурухананың акушерлік блогы да жүкті әйелдер мен сәбилерді медициналық тексеруден өткізу үшін заманауи аппараттармен жабдықтауды қажет етеді. Жалпы, қалалық әкімдік пен мәслихат балалар стационарының ғимаратын реконструкциялау және күрделі жөндеу жұмыстарын жүргізу үшін 2 млрд теңгеден астам қаражатты бөлуді оңтайлы қарастырды.